تہران(نیوز ڈیسک)اسرائیل کی جانب سے بمباری کا سلسلہ جاری ہے جبکہ ایران نے بھی اسرائیل پر بیلسٹک میزائل داغ دیے، سوشل میڈیا پر مختلف ویڈیوز گردش کررہی ہیں جن میں بتایا جارہا ہے کہ ایران نے اسرائیلی وزیراعظم نیتن یاہو کے گھر کو نشانہ بنایا جس پر سائرن بجنے لگے۔
ایرانی میڈیا کا بتانا ہے کہ قیصریہ میں نیتن یاہو کے خاندانی گھر کو نشانہ بنایا گیا ہے، ایران نے میزائل حملوں میں حدیرہ پاور اسٹیشن کو نشانہ بنایا ہے جبکہ حیفا ریفائنری پر کامیاب حملہ کیا ہے۔
دوسری جانب اسرائیلی میڈیا نے دعویٰ کیا ہے کہ ایران نے اسرائیل کے خلاف اپنے ردعمل کی شدت میں اضافہ کرنے کا فیصلہ کر لیا ہے، اسرائیلی چینل 12 ٹی وی نے ایک اہم سیکیورٹی ذرائع کے حوالے سے رپورٹ کیا ہے کہ تہران کی قیادت نے خطے میں اسرائیلی مفادات کے خلاف مزید سخت اقدامات کی منظوری دے دی ہے۔
رپورٹ کے مطابق اسرائیلی سکیورٹی حکام کو خدشہ ہے کہ ایران براہ راست یا اپنے حامی گروپوں کے ذریعے اسرائیل کے خلاف نئی کارروائیاں کر سکتا ہے۔
اسرائیلی حکام نے خطے میں موجود اپنی افواج اور سفارتی مشنز کو ہائی الرٹ کر دیا ہے جبکہ ممکنہ ایرانی حملوں سے بچاؤ کے لیے حفاظتی اقدامات مزید سخت کر دیے گئے ہیں۔
اب تک ایرانی حکام کی جانب سے اس اسرائیلی دعوے پر کوئی ردعمل سامنے نہیں آیا۔
Iranian military strikes Netanyahu's residence. -Al Jazeera#iranisraelwar pic.twitter.com/Ixx7PdDfYP
— Ahmad Hassan Bobak (@ahmad__bobak) June 15, 2025
